Renault ги објави првите фотографии од кабината на новиот, целосно-електричен Megane E-Tech Electric.
Новиот електричен Megane се очекува да биде претставен до крајот на оваа година, а беше најавен со Megane eVision концептот минатата година. Пазарното лансирање се очекува во првата половина од следната година, а фотографиите објавени на неодамнешниот прес-настан на Renault прикажуваат навистина футуристички пристап кон нештата.
Големиот дисплеј поставен пред возачот се припојува кон централниот мултимедијален уред. Забележуваме модерни инструменти и дигитализиран пристап – а сето тоа ветува дека Megane E-Tech Electric ќе се бори за највисоките позиции кога ќе пристигне на пазарот. Новиот главен дизајнер во Renault – Gilles Vidal – најави дека можеме да очекуваме значителни промени во ентериерите на моделите на Renault, и дека тие промени ќе започнат токму со Megane.
Инаку, електричниот Megane E-Tech Electtric користи батериски модул со капацитет од 60 kWh, поврзан со електромотор кој испорачува над 200 коњски сили и 300 Nm. Оваа комбинација би требало да овозможи автономија од околу 450 километри. Од Renault кажуваат дека со доволно моќен полнач, Megane ќе може да се наполни доволно за да помине 200 километри, со само 30 минути полнење.
Во моментов, Renault веќе нуди неколку различни електрични и плаг-ин хибридни возила. Сепак, амбициите објавени на прес-конференцијата кажуваат дека Renault сака да биде „најзелениот бренд во Европа до 2030“ и дека „9 од 10 продадени возила ќе бидат електрифицирани.“ Дополнително – и навистина амбициозно – Renault планира да рециклира до 120.000 возила годишно и плановите се 80% од стратешките материјали во батериите да бидат рециклирани.
