Компаниите PSA и FCA конечно го завршија спојувањето во групацијата Stellantis, која сега е четвртиот најголем производител на автомобили во светот.
Планот за спојување на двете компании беше официјално објавен при крајот на Октомври 2019. Според планот, секоја од двете компании ќе поседува удел од 50% во заедничката групација, која го доби името Stellantis и го постави главниот човек на групацијата PSA за извршен директор во новата компанија за првите пет години.
Во Ноември 2020 беше претставено и официјалното лого на Stellantis, а на почетокот од месецов, се одржа и гласањето на акционерите за одобрување на спојувањето.
Групацијата Stellantis сега има вкупно 14 автомобилски брендови во нивната гама, а тие се: Abarth, Alfa Romeo, Chrysler, Citroen, Dodge, DS Automobiles, Fiat, Jeep, Lancia, Maserati, Opel, Peugeot, Ram и Vauxhall. Оваа листа ја прави групацијата четврт најголем производител на автомобили во светот, веднаш позади Toyota, групацијата Volkswagen и алијансата Renault-Mitsubishi-Nissan.
Кружат разни шпекулации за укинување на некои од брендовите под групацијата, како последица на спојувањето, но сега за сега сè уште ништо не е потврдено. Почетниот план кој беше претставен во Ноември 2019 објавуваше дека сите автомобилски брендови ќе бидат задржани, но останува да видиме дали тоа навистина ќе биде така со оглед на новите еколошки рестрикции и лошата економска состојба, предизвикана од глобалната пандемија.
