Шведскиот произвoдител го откри многу-очекуваниот One:1 кој планира да го превземе приматот за најбрз сериски автомобил.
Koenigsegg One:1 е претставен како првиот мега-автомобил, поради тоа што нуди еден мегават сила што во превод значи дека неговиот 5.0-литарски V8 агрегат испорачува 1,360 коњски сили и вртежен момент од 1,371 Nm, при 6000 вртежи во минута. Оваа огромна сила е заробена во тело кое тежи 1360 килограм, што му овозможува на возилото совршен однос на сила со тежина од 1:1. Дистрибуцијата на тежина е 44 проценти напред / 56 проценти назад.
За испорака на силата кон задните тркала се грижат автоматски менувач со двојна спојка и седум степени на пренос, како и електронски диференцијал. Се очекува автомобилот да забрзува од место до 400 километри на час за околу 20 секунди, а неговата максимална брзина ќе биде околу 440 километри на час, со што ќе ја надмине неодамна утврдената на Hennessey Venom GT. Сепак, покрај брзината на правци, One:1 ќе биде подеднакво импресивен и на кривулести патишта. Неговите технички спецификации тврдат неверојатни две гравитациони сили во свиоци.
Ова е постигнато благодарение на тоа што Koenigsegg ја надгради задната суспензија со активни амортизери и карбонски пружини, додека системот за сопирање е преземен од Agera R, но сега ќе извршува полесна работа поради олеснувањето на шасијата. Како резултат на ова, за застанување од 400 км/ч ќе му бидат потребни само 10 секунди. Автомобилот е поставен на карбонски фелни со големина од 19-инчи напред и 20-инчи на задната оска, обвиени во специјални Michelin Cup пневматици со брзински индекс до 440 км/ч.
One:1 може да се погонува на нормален бензин, но и на E85 биогориво или тркачко гориво. Неговата светска премиера ќе се одржи на автомобилскиот саем во Женева, додека производството ќе биде ограничено на само шест примероци кои се веќе продадени.
