Ново Ferrari секогаш евоцира емоции кај фановите на брендот – и токму тоа се случува и денес – California T е првиот модел со турбополнач на Италијанскиот бренд по легендарниот F40!
Суфиксот T означува Turbo, а токму тоа е главната новост кај Ferrari California T. Новиот, 3.8-литарски V8 кој сега соработува со турбополнач испорачува 560 коњски сили – 60 коњски сили повеќе од досегашниот модел, но истовремено испорачува и 49% повеќе вртежен момент – сега има вкупно 755 Nm од 4750 вртежи во минута!
Благодарение на новиот мотор, California сега забрзува до 100 километри на час за 3.6 секунди, и ќе продолжи да забрзува сè до 315 километри на час, а инженерите од Ferrari се гордеат и со фактот дека новиот турбо мотор е 15% поекономичен од досегашниот атмосферец – би требало да троши само 9.6 литри на 100 изминати километри – резултати постигнати – секако – во перфектни услови.
Секако, бидејќи се работи за освежување, можеме да забележиме и нови браници како и нови светлосни групи кои ја доведуваат California во линија со останатите продукти на Маранело. California некако цело време беше како „заборавен“ модел на Ferrari, па ова освежување е повеќе од добредојдено.