BMW го користи i-подбрендот за да ги покаже своите познавања и можности, а за вашите пари ќе ја добиете највисоката можна технологија на баварскиот производител!
Да почнеме од најважното – i8 е придвижуван од хибриден погон, и тоа 1.5-литарски 3-цилиндерски агрегат врз кој нежно дишат два турбополначи и електромотор. Бензинскиот мотор испорачува 228 коњски сили и 320 Nm вртежен момент, а електромоторот испорачува дополнителни 129 коњски сили и 250 Nm вртежен момент. Вкупната, таканаречена системска моќност е 362 коњски сили и импресивни 570 Nm вртежен момент.
Системската моќност на i8 е доволна да го забрза овој технолошки ѕвер на BMW до 100 километри на час за 4.4 секунди и да продолжи да го „бутка“ се до максималните 250 километри на час – а истовремено да понуди просечна потрошувачка на гориво од само 2.5 литри на 100 километри!
Автомобилот може да работи во три режими – SPORT, COMFROT и ECO PRO. Спортскиот режим го оправдува своето име – избирањето на брзините е мануелно, а бензинскиот и електромоторот работат заедно за да ги понудат најдобрите можни пеформанси, а за батеријата да остане наполнета, рекуперацијата на енергија при кочење е на максималното можно ниво. COMFORT нуди баланс помеѓу спортскиот карактер и ефикасноста, а ECO PRO режимот ги прилагодува сите потрошувачи на електрична енергија да работат на најефикасен можен начин, со најмала потрошувачка на електрична енергија.
Максималниот домет на i8 во Comfrot е нешто над 500 километри (со полна батерија и резервоар), а автономијата може да се зголеми за 20% доколку се користи ECO PRO режимот. Батеријата се полни за околу 3.5 часа, и може да понуди автономија од 35 километри и максимална брзина од 121 километар на час.
BMW планира да го продава i8 во повеќе од 50 земји, но главните купувачи се очекува да бидат во Соединетите Американски Држави, Велика Британија, Германија и Франција. Цената во САД ќе започнува од $135.925, односно околу 103.000 евра. Продажбата ќе започне официјално во втората четвртина на 2014.
Интересно е што BMW најави дека сака i и M брендовите да ги држи одвоени, и дека инженери од M-дивизијата воопшто не работеле на i8. Ова најверојатно значи дека нема да видиме M-верзија на i8 во иднина, иако тоа би било интересен проект за Баварците.
