Renaultsport го претстави концептот Twizy Renault Sport F1, кој прикажува што ќе се случи доколку ставите технологија од формула еден во еден секојдневен електричен автомобил.
Концептот е поставен на тркачки тркала и има додадени делови кои може да се сретнат само кај болидите. Опремен е со голем преден сплитер, странични прагови со отвори за воздух, огромен заден спојлер и дифузер со интегрирано F1 светло за дожд.
Инженерите на Renaulsport го опремиле концептот со KERS систем, идентичен со болидите погонувани од Renault мотори. KERS системот е монтиран на местото на задното седиште и ја зголемува масата на возилото за 30 килограми. Со други зборови, концептот сега има само едно седиште и работи со оргиналниот електричен мотор кој произведува 17 кс. Благодарение на сите преправки, возилото сега тежи 564 килограми, што значи дека е за 91 килограм потешко од стандардниот Twizy.
KERS системот ја апсорбира енергијата која се создава при сопирање во батериите. Кога е наполнет, тој овозможува ослободување на дополнителни 79 кс во времетраење од 14 секунди, со што го поместува односот на сила спрема тежина од 1 кс/25 кг на 1 кс/ 5.8 кс. Ова му овозможува на концептот забрзување од место до 100 км/ч за само шест секунди, исто како Megane RenaultSport 265! Сепак, максималната брзина е далеку од F1 стандардните и изнесува 109 км/ч.
Renault нема да го произведе овој екстремен Twizy, но мораме да признаеме дека идејата да се опреми едно електрично возило со KERS систем е навистина одлична.
