По краток период откако повторно влезе во светскиот рели шампионат WRC во 2011 после долгогодишна пауза, Mini го напушта овој моторспорт.
Британскиот производител објави дека ќе го прекине неговото учество во WRC при крајот на 2012 година со повлекување на финансиската помош за фабричкиот тим “WRC Team Mini Portugal”. Лошите вести доаѓаат од Кај Сеглер, потпретседателот за бизнис координација и менаџмент на Mini.
Претставникот од Mini изјави дека откако брендот ќе ја заврши сезоната, Countryman JCW WRC ќе продолжи да се продава и ќе ги исполнува хомологациските обврски, овозможувајќи им на приватните тимови да се натпреваруваат со автомобилот во рели првенствата.
Во неговата кратка авантура во WRC, Countryman извојува три подиуми и повеќе топ-десет позиции, додека за неговиот најголем успех беше заслужен Дани Сордо во Јануари 2012, кога заврши на втората позиција на релито во Монте Карло.
