И покрај годините, XC60 е еден од најпродаваните модели на Volvo и токму затоа доби дискретно, но сепак важно освежување.
XC60 е на пазарот од 2016, кога и прв пат го возевме. Сега, за новата моделска година, Volvo подготви освежување за својот бест-селер.
Визуелните измени се дискретни, но сепак препознаваме елементи инспирирани од освежениот XC90. XC60 добива редизајнирана предна маска, потемни предни светла и редизајнирани тркала. Добива и две нови бои – Forest Lake и Aurora Silver. Плус, за прв пат ќе биде достапна бојата Mulberry Red која веќе се нуди кај неколку други модели на Volvo.
Кабината добива нов, поголем инфозабавен систем со дијагонала од 11.2 инчи. Уште поважно, инфозабавниот систем го носи најновиот софтвер на Volvo кој е базиран на Android. Покрај надградениот хардвер, системот доаѓа и со систем за Over the Air надополнувања, а Volvo тврди дека системот е двојно побрз од досегашниот благодарение на Snaprdagon Cockpit Platform основата на Qualcomm
Volvo не објави никакви информации околу евентуални измени или надградби на погонските единици, па претпоставуваме дека XC60 и понатаму ќе се нуди со електрифициран погон.
