Renault уште еднаш навлегува во минатото, именувајќи го своето ново електрично комбе по оригиналот од 1959 година.
Renault го покажа Estafette Concept на саемот IAA Transportation во Хановер, а неговото име беше објавено во последен момент. Истото е позајмено од легендарното комбе на Renault од минатиот век, додека неговото значење е изведено од италијанскиот збор staffetta, што во превод значи курир.
Неговата должина е слична со малиот Renault Kangoo, додека висината од 2.59 метри и товарниот простор од 7.1 кубни метри се повеќе споредливи со поголемиот Traffic. Пристапот до товарниот простор е достапен преку страничната лизгачка врата како и преку задната ролетна.
Во кабината има само едно седиште за возачот, додека контролната табла има повеќе екрани: седум инчен екран за возачот, 12-инчен инфозабавен екран и два екрани од 10 инчи за пренос на видеото од страничните камери. Голема е веројатноста дека целосно жолтата шема на внатрешноста ќе биде заменета со поразумна и издржлива црна пластична завршница кога возилото ќе влезе во производство.
Не се дадени детали за погонската единица на Estafette, па дури и дали конечниот сериски модел ќе изгледа како концептот. Сепак, со оглед на последните ретро-инспирирани дизајни на новиот 5 и претстојниот 4, можеме слободно да претпоставиме дека сериското возило ќе изгледа многу слично на овој концепт.
