Skoda UK одлучи да го испрати минатиот Superb со специјален примерок кој има 477 коњски сили и се вика едноставно… Sleeper Edition!
Superb Sleeper Edition е заеднички проект на Skoda UK и RE Performance. RE Performance е инженерскиот тим позади рекордерската Octavia која постигна максимална брзина од 365 километри на час на Bonneville Salt Flats во САД во 2011 – и токму овој тим работеше и на Superb Sleeper Edition.
Но што е Superb Sleeper Edition? Накратко, Superb навиен на максимум! Изграден врз одличниот Superb 2.0 TSI со 280 коњски сили, 350 Nm вртежен момент и погон на сите четири тркала (поздрав до форумџијата Микси!), големиот караван е доработен со нов мотор, нова суспензија, спортски сопирачки и уште неколку додатоци.
Резултат? Моторот е надграден од 280 коњски сили и 350 Nm вртежен момент на импресивни 477 коњски сили и 661 Nm вртежен момент. Секако, дел од приказната е поголем турбополнач, како и ревидиран и надграден систем за испорака на гориво, како и надграден систем за дишење и нов интеркулер. Дополнително, автомобилот добива и Handling Pack кој вклучува тркачка суспензија, која пак го приближува до подлогата за дополнителни 50 милиметри. Конечно, тука се и надградените сопираки од AP Racing со поголеми дискови и посилни клешти.
Но она што е најдобро од сè е дека ова е Sleeper Edition, однадвор автомобилот изгледа како ништо да не е чепнато. Superb Sleeper Edition е во Royal Green зелена боја која беше достапна само во 2023 во чест на крунисувањето на Кралот Чарлс Трети. Во кабината е задржана Cognac перфорираната кожа со контрастни шевови.
