Mercedes-AMG го претстави првиот модел од лимитираната, скапа серија која ја нарекува Mythos.
Добар ден и добредојде PureSpeed. Новиот PureSpeed е отворен двосед кој влече директна инспирација од тркачките автомобили на Mercedes-Benz од минатото, но и од Formula 1. Mercedes-Benz не признава официјално, но очигледно е дека PureSpeed е изграден врз основата на SL бидејќи ги користи предните и задните светла токму од луксузниот роудстер. Сепак, предниот браник нема решетка туку добива заострен, ајкулест лик.
Истовремено, PureSpeed нема ниту ветробранско стакло туку Halo структура како на F1 болид. Задниот дел е инспириран од легендарниот 300 SLR со кој Stirling Moss и Denis Jenkinson победија на легендарната Mille Miglia во 1955, додека бојата која преминува од Le Mans Red во Graphite Grey е инспирирана од возилото кое победи на Targa Florio во 1924.
Секако, многу внимание е посветено на деталите – карбонските аеро детали се наменети за да ја подобрат аеродинамиката, а тука се и карбонските аеро-поклопци на тркалата. Овие детали влечат искуство од Mercedes-AMG One. Интересно, Mercedes-AMG не објавува детали околу погонот, но можеме да претпоставиме дека добива некоја варијанта на погонот од SL 63 кој користи 4-литарски твин-турбо V8 за да располага со 577 коњски сили и 800 Nm.
Секако, постои и опцијата за плаг-ин хибридниот погон од Mercedes-AMG SL63 S E Performance кој испорачува вкупно 816 коњски сили и 1420 Nm вртежен момент, но со оглед на тоа дека не можеме да забележиме ниту отвор за полнење, ниту пак мислиме дека таквиот погон е во духот на PureSpeed, очекуваме дека Mercedes-AMG одлучиле да ја задржат проверената формула – моќен V8 и многу, многу звук!
Mercedes-AMG ќе произведе само 250 примероци од PureSpeed. Според нив, тие ќе бидат достапни „само за најпосветените Mercedes-Benz ентузијасти и колекционери“. Тоа значи дека шансите да видиме примерок на улица се блиску до непостоечки. Цената секако не е објавена, но сигурни сме дека на „најпосветените Mercedes-Benz ентузијасти и колекционери“ нема да им претставува проблем.
