Со Megane RS Ultime, Renault се збогува со RenaultSport дивизијата, додека со новиот Espace го трансформира моделот од миниван во голем SUV со 7 седишта.
Специјалниот Megane RS Ultime e произведен во само 1976 примероци и оддава на основањето на Renault Sport во 1976-тата година. Сите примероци се потпишани од тест-возачот на Renault, Laurent Hurgon – возачот кој постави многу рекорди со Megane RS.
Megane RS Ultime добива специјален бодикит кој е цели 60 милиметри поширок на предниот дел, односно 45 милиметри на задниот дел, а добива и дополнителни аеро-додатоци и преработен дифузер со централно-поставен завршеток на издувниот систем. Под поклопецот ќе го најдете веќе-познатиот 1.8-литарски турбо-бензинец од Megane RS Trophy кој испорачува одлични 300 коњски сили и 420 Nm вртежен момент.
Силата ја пренесува кон предните тркала преку 6-степен мануелен или 6-степен EDC автоматски менувач со двојна спојка, како и Torsen диференцијал со ограничено пролизгување.
Истовремено, тука е и новиот Espace. Со новиот Espace, Renault ги отфрла сите примеси на миниван кои гордо ги носеа досегашните генерации и цврсто се концентрира на тоа да понуди голем, просторен и практичен SUV. Интересно, новиот Espace е 14 сантиметри пократок и импресивни 215 килограми полесен од моделот кој го заменува, но затоа нуди попросторен трет ред седишта. Во зависност од конфигурацијата (можете да го нарачате Espace и само со пет седишта) багажниот простор варира меѓу 159 и 777 литри.
Во однос на технологиите, новиот Espace навистина има што да понуди. Дури и основните модели добиваат 12.3-инчен дигитален инструмен панел и 12-инчен централен дигитален дисплеј, а дополнително може да се нарача и 9.3-инчен хед-ап дисплеј.
