Kona Electric со N Line и N Line S варијанти добива промени во надворешниот и внатрешниот дизајн, како и некои корисни дополнувања во опременоста.
Од надвор, Hyundai Kona Electric N Line има нови браници напред и назад, освежени странични прагови и уникатен сет 19-инчни алуминиумски тркала. Наоколу има и неколку N Line ознаки, така што минувачите нема да го помешаат со стандардниот модел.
Во внатрешноста се вградени спортски седишта со N Line логоа, црвени контрастни шевови и црвени акценти на воланот и контролната табла. Дополнително има амбиентално осветлување, предни и задни грејачи на седишта и безжично полнење на паметни телефони.
N Line S пак добива седишта од алкантара и кожа со функционалност за греење и вентилација, двозонска контрола на климата и надграден звучен систем. Има и опционален LUX пакет за N Line S кој додава далечинска помош за паркирање, електрично подвижен кров и пакет помош за возачот Highway Driving Assist 2.
Hyundai ги нуди N Line и N Line S само со поголемата батерија од 65 kWh, со чија помош опсегот на возење достигнува до 453 км, а забрзувањето од 0 до 100 километри на час е 7,8 секунди.
Од Hyundai велат дека новите нивоа на опременост ќе се најдат во европските салони оваа пролет, а производството ќе започне во февруари.
