Само една седмица пред официјалната премиера на големиот SUV, Škoda објави скици од надворешниот дизај на новиот Kodiaq.
Од Škoda пристигнаа скиците од новиот Kodiaq, но чешкиот производител ја искористи шансата да истакне дека досега има продадено три милиони SUV модели – и дека токму три-милионитиот произведен SUV бил Kodiaq! Истовремено, напоменуваат дека Kodiaq е заслужен за една четвртина од произведените SUV модели, односно 841.900 возила досега – што пак го прави најпопуларниот SUV во историјата на брендот, додека на второто место е Karoq со 705.800 произведени примероци.
На скиците препознаваме нагласен, скулптуриран преден дел, аглести крила (кои според Škoda ќе кријат тркала со дијаметар од 17 до 20 инчи), нагласен заден браник и нови Top Led Matrix светла.
„Новиот Kodiaq е модерен и динамичен, со препознатлив изглед. Во линија со принципот дека формата треба да ја следи функцијата, ги вклучивме првите елементи од нашиот иден Modern Solid дизајнерски јазик. Дизајнот не само што ја нагласува практичноста, туку и ја подобрува аеродинамиката преку динамичната форма“ – изјави Oliver Stefani кој е на чело на Škoda Design.
Премиерата на новиот Kodiaq е закажана за 4ти Октомври, односно за идната седмица.
