Срцето на Mustang GTD (и не, не е турбодизел) е специјално-развиен компресорски 5.2-литарски V8 кој врти до над 7500 вртежи во минута и испорачува повеќе од 800 коњски сили!
Од Ford кажуваат дека Mustang GTD (никаква поврзаност со Golf GTD, очигледно) е нешто поинакво. Mustang GTD зема инспирација и технологии директно од GT3 тркачките автомобили а Ford најавува дека очекува дека ќе направи круг околу Nurburgring за помалку од 7 минути.
Всушност, приказната за Mustang GTD најдобро ја објаснува Jim Farley, главниот извршен директор на Ford – „Mustang GTD ги крши сите однапред-замислени идеи и поими за еден супер-автомобил. Ова е нов пристап за нас – не развивме уличен автомобил за патеката, туку направивме тркачки автомобил за улиците. Mustang GTD зема технологии од нашиот тркачки автомобил, ја замотува во карбонско тело и ја ослободува на улиците.“
Секако, освен моќниот 5.2-литарски V8, Mustang GTD добива и темелни модификации „под кожата“ – добива напредна полу-активна суспензија со адаптивни амортизери, како и хидраулично нагодување на висината. Компонентите овозможуваат поголема цврстина, а тука свој удел има и дополнителниот сабфрејм кој потекнува директно од тркачките автомобили. Дополнително, Mustang GTD е поставен на 20-инчни ковани алуминиумски (или магнезиумски) тркала обвиени во супер-спортски пневматици. Тркалата кријат карбон-керамички сопирачки од Brembo.
Многу, многу внимание е посветено на аеродинамиката. Инженерите на Ford под автомобилот поставиле дополнителен панел за насочување на воздухот, а хидраулично-контролирани предни клапи го подобруваат текот на воздухот. Крилата, поклопецот на моторот, поклопецот на багажниот простор, делови од вратите, целиот преден сплитер, заден дифузер и кров се изработени од карбон, а задниот спојлер се контролира хидраулично за да може да понуди различни нивоа на потисна сила.
Сега за сега немаме фотографии од ентериерот, но Ford кажува дека Mustang GTD ќе добие Recaro спортски седишта и многу 3д-испечатени компоненти во кабината. Најавено е дека купувачите ќе можат да го нарачаат Mustang GTD во која боја и да сакаат, но и дека ќе бидат достапни неколку различни комбинации на бои и многу опции за материјали во кабината.
Цената не е позната, но неофицијално се дискутира бројка од околу 300.000 Долари. Секој автомобил ќе започне со производство во фабриката на Ford во Flat Rock а ќе заврши со рачно изработување во погонот на Multimatic во Канада. Истовремено, ако навистина има повеќе од 800 коњски сили, Mustang GTD ќе биде најмоќниот сериски Mustang во историјата.
