Освежените Scala и Kamiq ќе дебитираат на 1ви Август, но Škoda веќе објави официјални скици од освежените хечбек и кросовер.
Škoda амбициозно ги најавува освежените Scala и Kamiq – и тоа го прави ни помалку ни повеќе, туку со изјава дека ќе добијат дизајнерски решенија и технологии од повисоките класи на автомобили. Што значи тоа?
Па во најмала рака, можеме да очекуваме затегнат дизајн – Scala добива заострени предни светла (со ЛЕД, секако), редизајнирана предна маска и значително редизајниран преден браник. На скиците гледаме и редизајниран заден браник, нови тркала, нови ознаки на задниот дел и уште неколку други ситни измени.
Kamiq ги задржува „двоспратните“ предни светла, но благодарение на поновите LED елементи сега се потенки и нијанса поостри. И тука забележуваме редизајнирани браници, како и нови задни светла. Задниот дел добива и нагласен дифузер. Всушност, подзамижете малку и задниот дел на Kamiq малку подзаличува на задниот дел на Lamborghini Urus, нели?
Сега за сега немаме информации какви освежувања би добиле кабините на Scala и Kamiq, но очекуваме и тие да добијат понови технологии кои од неодамна се достапни кај поголемите модели на Škoda. Во однос на погонските единици, не очекуваме драстични измени – односно и двата модели ќе ги задржат 1-литарските и 1.5-литарски TSI турбо-бензинци кои испорачуваат меѓу 95 и 150 коњски сили.
