Врвната изведба на популарното електрично возило на MG добива два електромотори за вкупно 435 коњски сили!
MG ја воскреснува ознаката XPower која за прв пат се појави во 2001 – и тоа за да понуди врвна изведба на својот супер-популарен MG 4. Благодарение на надградениот погон кој ќе има два електромотори, MG 4 XPower ќе располага со одлични 435 коњски сили и 600 Nm вртежен момент, кои пак ќе ги пренесува кон подлогата преку сите четири тркала. Резултат на сето тоа? Спринт до 100 километри на час за само 3.8 секунди, како и максимална брзина од 200 километри на час.
Од MG кажуваат дека внимание е посветено и на управувањето, како и на сопирањето. Суспензијата е поцврста за 25%, а додадени се и нови стабилизатори. За сопирање се задолжени нови 345-милиметарски предни дискови, кои се кријат позади нови 18-инчни тркала обвиени во Bridgestone Turanza пневматици.
Интересно, MG 4 XPower ќе го користи истиот батериски модул од 62 kWh кој веќе се нуди во MG 4 – а тоа значи дека автономијата паѓа на околу 380 километри.
Кабината добива спортски седишта обвиени во Алкантара, алуминиумски педали и уште неколку спортски детали. Инфозабавниот уред добива нов приказ кој овозможува следење на времиња на тркачки патеки и G-мерач.
Дали е ова првиот вистински електричен хот хечбек?
