Со неколку официјални скици, Volkswagen најави дека на пролет следната година ќе пристигне освежениот електричен ID.3.
Германскиот производител го најавува освежениот ID.3 како „втората генерација на ID.3“ – а тоа е интересно бидејќи сепак се работи за освежување. Интересно е поради тоа што токму ваквите најави сугерираат дека ID.3 ќе добие позначително освежување како во однос на дизајнот, така и во однос на материјалите во кабината и технологиите кои го придвижуваат.
Визуелните измени највероајтно нема да бидат драстични – препознаваме редизајнирани браници и други ситни детали. Кабината ќе добие нов, 12-инчен мултимедијален уред со нов надграден софтвер. Дополнително, ID.3 ќе добие и освежени инструменти како и поголем хед-ап дисплеј. Дополнително, забележуваме дека ја нема (на две од три скици од кабината) рачката за менувачот која беше поставена до инструментите.
Volkswagen најавува дека многу внимание е посветено на подобрување на квалитетот на материјалите во кабината и истовремено најавуваат дека ќе користат повеќе одржливи материјали и дека нема да користат материјали од животинско потекло. Најавуваат и дека кожниот управувач ќе биде заменет со „високо-квалитетна замена за кожа“.
Освежениот ID.3 ќе биде покажан на пролет следната година, а првите испораки се очекуваат неколку месеци подоцна.
