Минатата седмица Volkswagen ја започна изградбата на првата фабрика за батерии од вкупно шест. Фабриката се наоѓа во Салцгитер, Германија, а Volkswagen сака двојно да ги намали трошоците за изработка на батериите.
Според најавеното, Volkswagen ќе инвестира дури 20 милијарди Евра до 2030 во фабриките за батерии – и сака преку нив да стане светски лидер за електрични возила. Новата компанија се вика PowerCo и ќе биде задолжена за глобалното производство на батерии на Volkswagen. Компанијата ќе управува со целиот процес – од сурови материјали до рециклирање, а преку фабриката во Салцгитер и уште пет други кои се планираат за Европа, Volkswagen очекува дека трошоците ќе се намалат на половина.
Производството на батериски ќелии во Салцгитер ќе започне во 2025, а истовремено во фабриката ќе биде поставен и стандардизиран модел за производство кој ќе се користи и во останатите фабрики. Втората фабрика ќе биде во Валенсија, а останатите четири локации ширум Европа уште не се познати. Интересно е што PowerCo размислува за проширување на моделот на производство на батериите и во Северна Америка.
Очекувањата се дека само фабриката во Салцгитер ќе може да опслужи околу 500.000 електрични возила, а вкупно во фабриките во Европа ќе бидат произведени батерии за околу 3 милиони електрични возила. Според најавеното, во фабриките ќе работат вкупно околу 20.000 луѓе, а PowerCo ќе се занимава и со развој на решенија за складирање на електрична енергија за електричната мрежа.
