Subaru ја претстави првата фотографија од претстојниот BRZ пред неговото официјално дебитирање на 18-ти Ноември.
Фотографијата само делумно го открива изгледот на новиот BRZ. Поточно го прикажува дизајнот на предните LED светла со облините и линиите над предните тркала, а по малку се забележуваат и црни детали на отворот за вентилација во браникот.
Од претходните шпиунски фотографии може да се заклучи дека автомобилот ќе има голем централен отвор со решетка со крупна текстура на саќе, а покрај него ќе бидат два потесни вертикални отвори за воздух на предниот браник.
Линијата на каросеријата ќе биде позаоблена, со поналегнати ветробрански стакла, додека задниот дел ќе биде пократок и со поизразен спојлер. Се очекува задните светла да бидат споени со потесна вертикална светлечка лента.
Не се потврдени спецификациите, но се шпекулира дека новиот BRZ ќе биде погонуван од 2.4-литарски четири-цилиндарски бензинец кој произведува 220 кс и 240 Nm вртежен момент.
Ова е мало зголемување во однос на актуелната генерација, но повторно моделот BRZ ќе ги фаворизира управувањето и леснотијата пред големата сила.
