Новата Elantra доаѓа во интересно време за корејскиот производител – Hyundai интензивно работи на обновување на целата гама, но и на влез во луксузниот сегмент, а токму компактниот седан е најава за она што следи!
Верувале или не, ова е шеста генерација на Elantra. Она што почна пред повеќе од четвртина век, преку пет генерации кулминира со најновата, шеста генерација која денес е пред нас. Амбициите на Hyundai како да не познаваат граници – од обичен, „цивилен“ производител Hyundai сака да го надмине стереотипот за „глобален играч“ и да вмеша прсти во многу различни сегменти. Со N дивизијата ќе започне да нуди вистински спортски автомобили, а со брендот Genesis ќе се обиде да им ги заплетка конците на несоборливите германци.
Ако Hyundai го започна остварувањето на ваквите амбиции минатата година со новиот Tucson, тогаш приказната ја продолжува оваа година со новата Elantra. Компактниот седан е меѓу најзначајните автомобили на Hyundai и инженерите и дизајнерите сериозно си ја сфатиле работата. Новата генерација ги зема сите позитивни страни кои ги носеше претходната, ги надградува и подобрува, но истовремено е посветено внимание на сите забелешки кои купувачите и новинарите ги имаа – зa Hyundai овој пат да понуди навистина комплетен и компетентен автомобил.
Компетентен. Тој збор ќе се повторува во нашава рецензија – токму заради тоа што новата Elantra е навистина комплетен автомобил. Секако, како и кај секој автомобил имаме по некоја ситна забелешка, но сепак..
На самиот почеток, малку за дизајнот. Новата Elantra ги следи дизајнерските насоки на Hyundai па нуди привлечна комбинација од остри и меки линии. На предниот дел доминираат хексагоналната маска на ладилникот и широките, хоризонтални светлосни групи. Графиката на предните светла изгледа модерно, а од нив продолжува истакнатата карактерна линија која води директно кон задниот дел и истакнатиот заден „duck-tail“ спојлер – еден од нашите омилени детали. Како и на задниот, така и на предниот дел доминираат хоризонталните светлосни групи.
Во внатрешноста продолжува приказната за компетентност. Ја отвораме широката возачка врата и се спуштаме во возачкото седиште. Седењето е изненадувачки ниско, а седиштата нудат надпросечна странична поддршка. Управувачот се нагодува по висина и по длабочина, па лесно се наоѓа комфорна возачка позиција. Прегледноста е задоволителна, освен кон задниот дел – но Elantra стандардно доаѓа со задни сензори за паркирање, па ова и не е толку проблематично. Површините во ентериерот воглавно се обвиени со квалитетни материјали, и иако тука и таму има по некои поцврсти пластики, сепак скоро сè што секојдневно ќе допирате оддава чувство на долготрајност и издржливост.
Ги нема „заоблените“ линии од минатата генерација – овој пат е играно на европски минимализам, па инструментите се лесно прегледни и разбирливи, ергономијата е одлична и сите контроли се лесни за користење и веднаш ќе знаете да ги користите. Некои од прекинувачите би можеле да бидат со малку помодерен дизајн, a ќе забележиме и дека само возачкиот прозорец има автоматско отворање и затворање, но тоа се ситни детали на кои нема многу да замериме. Од друга страна, има навистина многу места за одлагање ситници – како во вратите, така и во централната конзола и во централниот потпирач поставен меѓу двете предни седишта.
На предните седишта има навистина многу простор, а истата приказна важи и за задната клупа. Лесно ќе се сместат двајца патници кои ќе имаат место како за колената, така и за главите. „Во шкрипец“ ќе собере и тројца на задната клупа, но не би го препорачале тоа за подолго патување. За поздрав е централниот наслон со вградени држачи за чаши на задната клупа, а Elantra може да се пофали и со дарежлив багажен простор – на располагање стојат 458 литри достапни преку прилично голем отвор, па внесувањето багаж не би требало да претставува проблем.
Онаму каде новата Elantra навистина отскокнува од минатата генерација е динамичноста и управливоста. Минатата генерација зад воланот нудеше чувство како во Cadillac од 80-тите години – имаше комфорна, но на моменти дури премека суспензија. Инженерите на Hyundai ги послушале критиките и новата Elantra е вистинско откровение! Суспензијата сè уште е ориентирана кон комфор – Elantra никогаш немала спортски претензии – но овој пат е значително поконтролирана и поцврста, без притоа да биде претврда.
Вперете го автомобилот во свиок и ќе бидете изненадени со колку самоконтрола Elantra го исполнува очекуваното. Суспензијата одлично си ја врши работата и ги впива и помалите и поголемите нерамнини, но истовремено нуди цврстина која е дел од равенката за комфор. Всушност – чувството зад воланот е некако.. Германско!
Маневрирањето низ град го олеснува супер-лесниот серво управувач кој можете да го вртите и со мал прст, а вистинско задоволство е да се користи прецизниот шест-степен мануелен менувач. 1.6-литарскиот MPI атмосферски бензинец не вреска со своите перформанси, но е сосема доволен за просечен семеен автомобил. Официјалните податоци зборуваат за забрзување до 100 километри на час за 10.1 секунда и максимални 200 километри на час. Максималната моќност од 128 коњски сили е достапна на високи 6300 вртежи во минута, додека максималните 157 Nm вртежен момент се достапни од 4850 вртежи во минута.
Во град измеривме потрошувачка која се движеше нешто над 8 литри на 100 километри – во рамките на прифатливото за автомобил со овие димензии и бензински мотор. На отворено потрошувачката е значително пониска, а Elantra изненадува со рафинираноста и тивката кабина, дури и на повисоки брзини.
На самиот крај, можеме да зборуваме малку и за опремата и безбедноста. Нашиот тестен автомобил дојде во повисокото ниво на опрема наречено Style, а вкучува светла за магла, LED дневни светла, алуминиумски фелни, предни и задни сензори за паркирање, управувач и менувач обложени со кожа, електрично нагодливи ретровизори со загревање, мултимедијален уред со можност USB и Bluetooth поврзување, автоматски двозонски клима уред, деллива задна клупа и уште многу други ситници. Од безбедносната опрема ги истакнуваме четирите воздушни перничиња, воздушните завеси и целата гама на електронски помагала во форма на ABS + EBD, ESP и TCS.
Конечно, зошто сме толку убедени дека Elantra е толку компетентно возило? Затоа што не само што успеа да ги исполни очекувањата, туку и ги надмина. Доколку сакате комфорен, семеен автомобил кој истовремено ќе биде исклучително практичен, но и рафиниран и економичен, Elantra тука навистина има што да понуди. Квалитетот и гаранцијата нa Hyundai се одличен аргумент за Elantra, а кога на сето тоа ќе ги додадеме сите квалитети кои ги нуди, повеќе од јасно е дека корејскиот производител има силен играч во својот тим!
- Мотор: 1.6 литарски атмосферски бензински мотор, 4 цилиндри
- Моќност: 128 коњски сили / 6300 вртежи во минута
- Вртежен момент: 157 Nm / 4850 вртежи во минута
- Менувач: Мануелен, 6 брзини
- Максимална брзина: 200 км/час
- Забрзување 0-100: 10.1 секунди
- Должина: 4570 mm
- Ширина: 1800 mm
- Висина: 1435 mm
- Тежина: 1310 kg
- Меѓуоскино растојание: 2700 mm
- Багажен простор: 458 литри
- Потрошувачка: 8.2 литри на 100 километри (измерена, градска)
- Цена на тестираниот модел: Hyundai Elantra 1.6 GLS Style – 15.550 Евра
Фотографија: Дејан Маликовски
