Караваните на Volvo за многумина се синоним за она што значи едно возило да биде караван – а новиот V90 ветува дека повторно ќе постави нови правила – па да се навратиме на неговата историја!
Големи, комфорни и практични – тука во CARclub сме фанови на караваните. Едноставно, има нешто „кул“ во нив – а еден од најлегендарните брендови кога станува збор за каравани е токму шведскиот Volvo.
Шведскиот бренд ја изгради својата репутација и добар дел од својата историја врз основа на овие практични, привлечни и безбедни автомобили – и низ изминативе шест децении продаде повеќе од шест милиони вакви автомобили низ целиот свет – третина од сите автомобили кои Volvo ги има продадено. Бидејќи премиерата на новиот V90 (базиран на новиот S90 седан) е закажана за 18-ти Февруари, решивме дека ова е одлична можност да се навратиме на историјата на караваните на Volvo.
Volvo Duett
Duett е првиот караван на компанијата. Автомобилот е лансиран во далечната 1953-та година и е еден од првите Volvo автомобили кои пристигнале на Американскиот пазар.
Volvo 221 Amazon
Компанијата го искористи искуството од Duett за да понуди порафиниран и поелегантен автомобил, но истовремено да понуди и поголем багажен простор.
Volvo 1800 ES
Еден од најпознатите и најпопуларните Shooting Brake модели во историјата на автомобилите. Истакнувајќи ги своите премиум амбиции, Volvo го конструираше легендарниот 1800 ES да може да собере палки за голф во багажниот простор, но истовремено да го задржи спортскиот карактер.
Volvo 245 Turbo
Легендарниот 245 е можеби најпрепознатливиот караван на Volvo на сите времиња. 245 се произведуваше скоро 20 години и беше првиот караван со турбо-полнет мотор. Ова е автомобилот со кој Volvo стана вистински препознатлив за правење на практични, просторни и (во 245 Turbo варијантата) брзи каравани.
Volvo 960
960 беше последниот модел на Volvo со погон на задните тркала. Моделот го карактеризираа понежни линии, но истовремено и доволно простор за сè што можете да замислите.
Volvo 850 T5-R
Со налудничавиот 850 T5-R претставен во 1994, Volvo покажа дека сè уште знае да се забавува. Овој караван можеже да се пофали со 240 коњски сили и забрзување до 100 километри на час за само 6.9 секунди – бројки кои и денес се повеќе од респектабилни. Со овој модел Volvo се впушти и во трки – и постигна забележителен успех во BTCC.
