Францускиот производител се подготвува за уште еден настап на Дакар релито – каде ќе се појави со освежен и подобрен 2008 DKR!
Peugeot Sport со гордост го претсстави новиот 2008 DKR – кој доаѓа со ново Red Bull брендирање, но и значително ревидирана каросерија – и изгледа уште поагресивно од порано! Новиот 2008 DKR е цели 167 милиметри поширок, 118 милиметри понизок и 185 милиметри подолг – и сега е широк 2200 милиметри, висок 1794 милиметри и долг 4284 милиметри. Интересно е да се забележи дека иако автомобилот е подолг, надвисоците се скратени, бидејќи и меѓуоскиното растојание е зголемено за 200 милиметри на рамно 3000 милиметри.
2008 DKR сега има едноделни, 17-инчни тркала изработени од магнезиум, обвиени во 37/12.5/17 гуми изработени од Michelin, а за моќта е задолжен изменет и подобрен 3.2-литарски би-турбо V6 турбодизел кој испорачува одлични 350 коњски сили и монументални 800 Nm вртежен момент. Моќта е зголемена за само 10 коњски сили, но вртежниот момент е зголемен за цели 212 Nm, и максималниот вртежен момент сега е достапен при 5000 вртежи во минута, наместо досегашните 7800 вртежи во минута. Силата се пренесува кон задните тркала преку секвенционален мануелен менувач.
Луѓето од Peugeot Sport очигледно се сериозни околу Дакар релито, а новиот 2008 DKR би требало да се покаже како одличен партнер на живите легенди – Sébastien Loeb, Stéphane Peterhansel, Cyril Despres, и Carlos Sainz. Следното Дакар Рели ќе започне на 2ри Јануари во Буенос Аирес, Аргентина, и ќе заврши по скоро 10.000 изминати километри во Росарио, Аргентина.
