За вкусовите не се зборува, но ова веќе излегува надвор од секоја граница. Ајде да си играме „препознај го делот“ со овој чуден монструм на италијанските „дизајнери“ од FB-Tuning!
Приказната за FB-One на FB-Tuning е следната – сопственикот на ова тјунинг „студио“ (го користиме терминот „студио“ многу лабаво) – Fabio Barletta – решил дека сака да направи сопствен автомобил. Идејата е одлична – секогаш сакаме да гледаме нови автомобили. За жал, егзекуцијата на таа идеја не поминала толку добро. Значи, да видиме – она што можеме да го препознаеме е следното – платформата е земена од Chrysler Crossfire, односно од првата генерација SLK на Mercedes-Benz. Платформа која е толку стара, што најверојатно диносаурусите ја користеле како скејт-борд. Додадете на тоа предни светла и маска од Audi A8 и задни светла од ABT-изведбата на Audi Q7 и го добивате она што е денес пред нас – FB-Tuning FB-One.
Претставен на овогодинешниот Top Marques Monaco, овој несекојдневен (и се радуваме дека е така) автомобил ги привлекуваше погледите на минувачите, и тоа заради сите погрешни причини. Почнувајќи од непривлечниот дизајн, па до бојата во која има ситни парченца злато. Единствен позитивен детал кај овој автомобил е 3.2-литарскиот, компресорски V6 мотор кој е позајмен од Mercedes-Benz SLK 32 AMG и сега испорачува 400 коњски сили.
Нашето мислење е очигледно. Да се надеваме дека нема да има FB-Two.
