Јапонскиот бренд го претстави својот 1.5-литарски три-цилиндарски бензински агрегат со турбополнач кој ќе се користи кај тркачкиот автомобил ZEOD RC.
Моторот со ознака “DIG-T R” испорачува импресивни 400 кс и максимален вртежен момент од 380 Nm, до максималните 7,500 вртежи во минута. Неговата тежина изнесува само 40 килограми, а според Nissan нуди повеќе сила по килограм од мотор на болид од Formula 1. Покрај тоа што е многу лесен, агрегатот е исто така компактен во димензии, со должина од 400mm, ширина од 200mm и височина од 500mm.
DIG-T R ќе работи во комбинација со засега непознат електричен погон, со кој ќе биде поврзан преку пет-степена трансмисија. Електричниот погон ќе го придвижува ZEOD во првиот круг, а потоа во остатокот од целиот маратон ќе вози малиот турбо-бензинец.
Во наредниве неколку месеци Nissan ќе го тестира ZEOD RC за да биде целосно подготвен на предизвиците во 24 часа Ле Ман.
