За пригодно да го прослави својот 50-ти роденден, Lamborghini го претстави Egoista – посветен од Walter De Silva за италијанскиот бренд!
Една од причините заради која го сакаме Lamborghini е налудничавоста која се асоцира со овој италијански производител. Да, Ferrari прави убави автомобили, но Lamborghini прави луди автомобили. Токму таква е приказната и со Egoista. Автомобилот со само едно седиште (па затоа го носи и името) е инспириран од Apache хеликоптерите, а тоа може да се примети по многуте ситни детали.
Под таа уникатна каросерија се крие 5.2-литарскиот V10 добро познат од Gallardo (од каде најверојатно е преземена и основата) кој испорачува 600 коњски сили. Официјални бројки околу перформансите нема, но да бидеме искрени – тие и не се толку важни. Важен се дизајнот, концептот и филозофијата на овој автомобил – а токму тоа најдобро го искажува дизајнерот Walter De Silva – „Како да го слушам Feruccio Lamborghini: Ќе го ставам моторот позади. Не ми треба патник. Го сакам за мене, како што го замислувам да биде. Тоа е фанатично возило, Egoista му прилега.“
Ова е подарок од Lamborghini за Lamborghini. Никој никогаш нема да го поседува, и секогаш ќе остане сон.
