Италијанскиот производител на елегантни и спортски автомобили – Alfa Romeo – ги претстави првите детали за концептот Gloria пред неговото дебитирање во Женева.
Направен во соработка со студентите на Европскиот Институт за Дизајн (IED) во Торино, концептот Gloria е стилски купе-седан направен да ги освои симпатиите на Азиските и Американските купувачи. Дизајнот на автомобилот се одликува со мазни и заоблени површини со остри завршетоци и контрастен покрив. За дизајнот на големите 20-инчни тркала се погрижиле специјалистите за алуминиумски и екстра лесни фелни OZ.
Како што може да видиме на фотографијата, на предниот дел е истакната решетката од брендот, покрај која се ниските, широки LED предни светлосни групи и големите отвори за воздух. Gloria се протега во должина од 4700mm, 1920mm широчина и 1320mm височина со меѓуоскино растојание од 2900mm, што значи дека има приближни димензии како Audi A5 Sportback.
Италијанскиот бренд вели дека концептот е дизајниран за да биде погонуван од истите V6 и V8 погонски единици кои се вградуваат во Maserati Quattroporte. Секако, иако е само концепт, Gloria е интересен поглед кон идниот дизајнерски јазик на Alfa Romeo.
