Пред само неколку минути, новиот Outlander на Јапонскиот производител Mitsubishi ја имаше својата премиера пред Македонската јавност!
Најновата, трета генерација на Јапонскиот SUV носи многу новитети – а најприметливиот новитет е токму новиот дизајнерски јазик на Mitsubishi кој ги наговестува моделите кои доаѓаат. Драстичната девијација од Jet Fighter филозофијата е интересно освежување, и го издвојува новиот Outlander како од претходниот модел, така и од конкуренцијата.
Во моментов се нуди само еден мотор – 2.2-литарскиот турбодизелски агрегат кој ни е познат од минатата генерација, но со измени за да биде почист и поекономичен. Моќноста е малку намалена, на 150 коњски сили, но затоа моторот сега ги задоволува и најстрогите еколошки норми. Ќе се нудат три нивоа на опрема – Intense, Intense+ и Intense Navi. Можете да погодите дека највисокото ниво на опрема доаѓа и со уред за навигација, но и со кожни седишта со загревање, сончево кров, електрично отворање на петтата врата, и многу други ситници.
Според најавата, потрошувачката (со мануелен менувач) изнесува 6.4 литри гориво во градски услови. Цените започнуваат од 28.980 евра со основиот пакет опрема, а се до 34.980 евра со највисокото ниво на опрема и мануелен менувач. Најскапиот Outlander кој можете да го добиете чини 38.980 евра со највисокото ниво на опрема, но и со автоматски менувач, адаптивен темпомат, заштита од судар и систем за предупредување при напуштање на коловозната лента.
Се надеваме дека наскоро ќе имаме шанса подобро да ги запознаеме карактеристиките на новиот Outlander!
