Четири месеци откако Peugeot го прикажа 208 R2 рели автомобилот во Мај, Францускиот производител ни ја претставува посилната варијанта 208 Type R5, која ќе биде прикажана на Семот во Париз.
R5 категоријата содржи возила од Група А создадени од модели излезени во сериско производство, кои се продадени во најмалку 25,000 примероци. Максималната цена за автомобилите од R5 класата изнесува 180,000 евра.
Направен како замена за 207 Super 2000, овој нов модел ќе почне да се натпреварува во рели првенствата од втората половина на следната година. Главната разлика помеѓу двата модела е погонската единица. Peugeot Racing го замени 2.0-литарскиот атмосферски агрегат со 1.6-литарски турбо мотор.
4-цилиндарскиот 1.6-литарски турбо бензински агрегат развива 280 кс при 6,000 вртежи и максимален вртежен момент од 400 Nm при 2,500 вртежи во минута. Автомобилот е со погон на сите тркала усогласен со пет-степен секвенцијален менувач и два диференцијали со автоматско затворање.
Рели автомобилот е долг 3962 mm, широк 1820 mm и има меѓуоскино растојание од 2560 mm. Школката на возилото е околу 40 килограми полесна во споредба со 207 Super 2000 кој е на заминување. R5 ќе се нуди со алуминиумски едноделни 18-инчни тркала за по асфалт и 15-инчни за по земјени патишта.
